C’hoariva
Teatr brezhonek
Kenstrollad an Arzoù Leurenn e Yezhoù Bro
Kroget hon eus da labourat a-gevret gant Kompagnunez La Rampe TIO eus Montpellier ha gant Ti-kêr Rodez evit prientiñ an darvoud pouezus-mañ evit ar c’hoarivaoù e yezhoù bro. Spi hon eus e vo muioc’h a dud c’hoazh eget warlene evit kas ar preder pelloc’h ha marteze piv oar krouiñ un oberenn a-stroll.
Degemeret e vimp neuze e C’hoariva ar Chariot, un neizh bihan e kreiz kêr Rodés hag a zegemero ac’hanomp adarre.
C’hoariva zo ur c’hevread rannvro savet e 2005 evit bodañ, liammañ, ambroug ha bountañ war-raok ar stolladoù (amatourien hag a-vicher) ha dre vras ar c’hoariva e brezhoneg. A vloaz da vloaz eo aet war-raok ar gevredigezh.
Kavout a reoc’h el lec’hienn-mañ keleier diwar-benn ar strolladoù, ar pezhioù-c’hoari ha kement tra degouezhet a nevez e bed ar c’hoariva e brezhoneg.
Youl hon eus ivez da vont pelloc’h ganti ha da sevel ur benveg a vo renablet ennañ dafar skrivet evit ar c’hoariva. N’emañ ket ganeomp an dezo krouiñ un dra glok met m’ho peus c’hoant reiñ an dorn deomp evit pinvidikaat ha gwellaat al lec’hienn-mañ : grit mont e darempred gant ar gevredigezh. Mersi bras deoc’h en a-raok.
Piv bennak ez oc’h e hetomp deoc’h donemat amañ hag ur weladenn vat.
